Num 34 | NdeIBE | STEP | UJehova wathi kuMosi,

Numbers 34

Imingcele yaseKhenani

1 UJehova wathi kuMosi, 2 “Laya abako-Israyeli uthi kubo: ‘Nxa lingena eKhenani, ilizwe elizaliphiwa libe yisabelo senu lizakuba lale imingcele: 3 “ ‘Icele leningizimu yenu lizahlanganisa isigaba esithile seNkangala yaseZini kulandela umngcele we-Edomi. Empumalanga, umngcele wenu weningizimu uzasukela ekucineni koLwandle Lwesawudo,

4 udabula eningizimu yokhalo lwe-Akhirabhimu, kusiya ngaseZini njalo kuye eningizimu yeKhadeshi Bhaneya. Usuka lapho uzaqonda eHazari Adari njalo wedlulele e-Azimoni, 5 lapho ozajika khona, kuhlangane lesiHotsha saseGibhithe njalo uyephelela eLwandle lwaseMeditheraniyeni.

6 “ ‘Umngcele wenu wentshonalanga kuzakuba ligumbi loLwandle oLukhulu. Lo uzakuba ngumngcele wenu entshonalanga.

7 “ ‘Okomngcele wenu wenyakatho, sukelani eLwandle oLukhulu lisiya eNtabeni yaseHori lithi lisuka eNtabeni yaseHori 8 liye eLebho Hamathi. Umngcele uzasuka lapho uqonde eZedadi, 9 ubusuqhubeka usiya eZifironi uze uyekuma eHazari Enani. Lo yiwo umngcele wenu enyakatho.

10 “ ‘Okomngcele wenu wempumalanga, sukelani eHazari Enani kusiya eShefamu.

11 Umngcele uzakwehla usuka eShefamu usiya eRibhila engempumalanga kwe-Ayini njalo uqhubeke ulandela umehlo empumalanga koLwandle lwase-Khenerethi. 12 Kusuka lapho umngcele uzakwehla ulandela umfula uJodani uze uyecina eLwandle lweSawudo. “ ‘Leli lizakuba yilizwe lenu, ngemingcele yalo nxa zonke.’ ”

13 UMosi walaya abako-Israyeli wathi: “Yabelanani lelilizwe ngenkatho njengelifa lenu. UJehova usekhuphe isiqondiso sokuthi aliphiwe izizwana ezifica munye kanye lesizwana esiyingxenye, 14 ngenxa yokuthi abezimuli zesizwana sikaRubheni, abesizwana sikaGadi kanye lengxenye yesizwana sikaManase sebethole isabelo sabo. 15 Izizwana lezi ezimbili kanye lalesi esiyingxenye sezithole isabelo sazo eceleni lempumalanga lomfula uJodani, ngokuya ngempumalanga.”

16 UJehova wathi kuMosi, 17 “ ‘La ngamabizo amadoda azalabela ilizwe njengelifa lenu: u-Eliyazari umphristi kanye loJoshuwa indodana kaNuni. 18 Beselikhetha umkhokheli oyedwa esizwaneni ngasinye ukuncedisa ukwaba ilizwe:

19 La yiwo amabizo abo: uKhalebi indodana kaJefune, owesizwana sakoJuda;

20 uShemiyeli indodana ka-Amihudi, owesizwana sakoSimeyoni;

21 u-Elidadi indodana kaKhisiloni, owesizwana sakoBhenjamini;

22 uBhuki indodana kaJogili, umkhokheli ovela esizwaneni sako-Dani;

23 uHaniyeli indodana ka-Efodi, ongumkhokheli ovela esizwaneni sikaManase indodana kaJosefa;

24 uKhemuyeli indodana kaShifuthani, engumkhokheli ovela esizwaneni sako-Efrayimi indodana kaJosefa;

25 u-Elizafani indodana kaPhanaki, umkhokheli ovela esizwaneni sika-Isakhari;

26 uPhalithiyeli indodana ka-Azani, umkhokheli ovela esizwaneni sika-Zebhuluni,

27 u-Ahihudi indodana kaShelomi, umkhokheli ovela esizwaneni sika-Asheri;

28 u-Phedaheli indodana ka-Amihudi, umkhokheli ovela esizwaneni sika-Nafthali.”

29 La yiwo amadoda uJehova alaya ukuthi ahlukanisele abako-Israyeli isabelo sabo selizwe laseKhenani.